ឯកឧត្តមអភិសន្តិបណ្ឌិត ស សុខា ដឹកនាំគណៈប្រតិភូជាន់ខ្ពស់ធ្វើមាតុភូមិនិវត្តន៍មកដល់កម្ពុជាវិញដោយសុវត្ថិភាព បន្ទាប់ពីបញ្ចប់បេសកកម្មការងារនៅសាធារណរដ្ឋសង្គមនិយមវៀតណាម ដោយជោគជ័យ

នារសៀលថ្ងៃសុក្រ ៦រោច ខែភទ្របទ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី២ ខែតុលា ឆ្នាំ២០២៦នេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដឹកនាំគណៈប្រតិភូជាន់ខ្ពស់ក្រសួងមហាផ្ទៃ នៃរាជរដ្ឋាភិបាលកម្ពុជា ធ្វើមាតុភូមិនិវត្តន៍មកដល់ព្រះរាជាណាចក្រកម្ពុជាវិញប្រកបដោយសុវត្ថិភាព។

ធ្វើមាតុភូមិនិវត្តន៍នេះ ធ្វើឡើងបន្ទាប់ពីឯកឧត្តមអភិសន្តិបណ្ឌិត និងគណៈប្រតិភូ បានអញ្ជើញចូលរួម “សន្និសីទជាន់ខ្ពស់អនុវត្តច្បាប់អាស៊ាន ស្តីពីកិច្ចសហប្រតិបត្តិការក្នុងការបង្ក្រាបជនល្មើសរត់គេចខ្លួន” នៅរដ្ឋធានីហាណូយ សាធារណរដ្ឋសង្គមនិយមវៀតណាម ប្រកបដោយលទ្ធផលផ្លែផ្កា ចាប់ពីថ្ងៃទី២៩ ខែកញ្ញា ដល់ថ្ងៃទី២ ខែតុលាឆ្នាំ២០២៦

សន្និសីទថ្នាក់តំបន់នេះ គឺជាជំហានដ៏សំខាន់មួយក្នុងការរឹតចំណងកិច្ចសហប្រតិបត្តិការ រវាងអាជ្ញាធរអនុវត្តច្បាប់នៃបណ្តាប្រទេសសមាជិកអាស៊ាន ដើម្បីបង្កើនប្រសិទ្ធភាពក្នុងការទប់ស្កាត់ បង្ក្រាប និងផ្លាស់ប្តូរព័ត៌មានជុំវិញបទល្មើសឆ្លងដែន ជាពិសេសការតាមចាប់ខ្លួនជនល្មើសដែលរត់គេចខ្លួន ក្នុងគោលបំណងលើកកម្ពស់សន្តិសុខ ស្ថិរភាព និងសុវត្ថិភាពក្នុងតំបន់ទាំងមូល។

#ឯកឧត្តមអភិសន្តិបណ្ឌិតសសុខា #ក្រសួងមហាផ្ទៃ #អាស៊ាន #កិច្ចសហប្រតិបត្តិការអនុវត្តច្បាប់ #សន្តិសុខតំបន់ #កម្ពុជា